Coronavirus: Umuntu wa mbere uyifite muri Tanzania yahageze avuye mu Bubiligi

Tanzania

Ummy Mwalimu minisitiri w'ubuzima muri Tanzania amaze gutangaza ko muri iki gihugu habonetse umuntu wa mbere ufite coronavirus.

Minisitiri Mwalimu yagize ati: "Ndashaka Abatanzania ko ejo tariki 15 z'uku kwezi twakiriye umugenzi w'umutanzania, umugore w'imyaka 46 wageze mu gihugu mu ndege ya Rwandair avuye mu Bubiligi".

Indege ya Rwandair isanzwe ikora ingendo muri Tanzania no mu Bubiligi. Rwandair ntacyo iratangaza ku byavuzwe na minisitiri wa Tanzania.

Yavuze ko hagati ya tariki 05 na 13 z'uku kwezi uwo mugenzi yatembereye mu bihugu bya Suwede na Danemarke akagaruka mu Bubiligi mbere yo kugaruka iwabo ejo tariki 15 saa kumi z'umugoroba.

Madamu Mwalimu avuga ko uyu mugenzi yaciye ku kibuga cy'indege cya Dar es Salaam bakamupima bakabona nta kibazo afite.

Ariko ko nyuma yaje kumva atameze neza ageze i Arusha, akijyana kwa muganga agafatwa ibipimo byoherejwe kuri laboratoire ya leta iri i Dar es Salaam.

Ati: "Ibipimo byemeje ko afite Covid-19, ubu amerewe neza ari guhabwa imiti,ndashaka kubwira abaturage ko iyi ndwara ishobora gukumirwa ntikwirakwire mu gihugu".

Tanzania ibaye igihugu cya gatatu muri aka karere kigezemo iyi virus nyuma ya Kenya n'u Rwanda.

Madamu Ummy Mwalimu asaba abaturage kudakuka umutima no gukomeza ingamba zo kwirinda ikwirakwira ry'iyi ndwara harimo gukaraba intoki neza.

Muri Somalia

Kuri iki igcamunsi kandi minisitiri w'ubuzima muri Somalia yatangaje ko muri iki gihugu habonetse umurwayi wa mbere ufite Covid-19.

Minisitiri Fowsiya Abukar yavuze ko uyu ari umuturage wa Somalia uherutse kuva mu mahanga.

Leta ya Somalia yatangaje ko ihagaritse ingendo mpuzamahanga z'indege zose zijya cyangwa ziva muri iki gihugu mu gihe cy'ibyumweru bibiri uhereye tariki 18 z'uku kwezi.

Somalia imaze igihe iri mu bihe bidasanzwe kubera inzige zibasiye ibihingwa.

Somalia yabaye igihugu cya 20 mu bihugu bya Afurika byo munsi y'ubutayu bwa Sahara bimaze kugeramo coronavirus.

Covid-19 muri Afurika yo munsi y'ubutayu bwa Sahara kugeza ubu:

  • Afurika y'Epfo -62
  • Senegal - 24
  • Rwanda -5
  • Cameroun -4
  • C?te d'Ivoire - 4
  • Ethiopia - 4
  • Burkina Faso - 3
  • Kenya - 3
  • Seychelles - 3
  • Nigeria - 2
  • DR Congo - 2
  • Namibia - 2
  • Sudan - 1
  • Centre Afrique - 1
  • Congo Brazza - 1
  • Gabon -1
  • Guinea -1
  • Eswatini -1
  • Togo -1
  • Tanzania - 1
  • Somalia - 1