Coronavirus - Rwanda: Umupolisikazi wari mu butumwa bwa UN, ni uwa 2 yishe

Rwanda police
Insiguro y'isanamu,

Uwapfuye ari mu bapolisi baheruka kujya mu butumwa bw'amahoro

Minisiteri y'ubuzima mu Rwanda yatangaje ko hari umurwayi w'imyaka 24 wishwe na coronavirus, ivuga ko yari umupolisikazi wari mu butumwa bw'akazi mu mahanga aho yayanduriye akazanwa mu Rwanda arembye.

Mu mibare yatangajwe mu Rwanda habonetse abanduye bashya barindwi(7) n'abakize barindwi, abanduye bose hamwe bamaze kuba 384 mu gihe abayikize ari 269 naho abo yishe ni babiri.

Uyu mupolisikazi w'ipeti rito mu gipolisi cy'u Rwanda yari mu butumwa mu majyaruguru ya Sudani y'Epfo mu mujyi wa Malakal, umujyi wa kabiri nyuma y'umurwa mukuru Juba.

Umwe mu bapolisi bari kumwe na we mu butumwa yabwiye BBC ko uyu mukobwa yari mu bakora akazi ko kwita kuri bagenzi be, ko yari mu itsinda riheruka kujya mu butumwa bw'amahoro mu mezi ashize.

Uyu mupolisikazi yari mu cyiciro cy'abapolisi n'ingabo b'u Rwanda bari muri Sudani y'Epfo bazwi nka RWAFPU-1 mu butumwa bwa UNMISS. Yari amaze igihe kirenga icyumweru agejejwe mu Rwanda.

Abaye umuntu wa kabiri wishwe na Covid-19 mu Rwanda nyuma ya Hassan Gisaka wishwe n'iki cyorezo mu mpera y'icyumweru gishize.

Ku isi, coronavirus imaze kwandura abantu miliyoni 6,4 abamaze kuyikira ni miliyoni 3 mu gihe abo imaze kwica ari 382,479 nk'uko bivugwa na Kaminuza ya Johns Hopkins yo muri Amerika.

Muri Sudani y'Epfo abanduye bariyongereye mu gihe gito gishize ubu bageze kuri 994 mu gihe imaze kwica abantu 10.

Gisenyi na Rubavu mu kato

Mu buryo bwari bwitezwe, inama y'abaminisitiri mu Rwanda yemereye abatwara za moto mu Rwanda gusubira mu mihanda, uretse mu turere twa Rusizi na Rubavu mu burengerazuba.

Hari hashize amezi abiri abatwara moto mu Rwanda - babarirwa mu 50,000 - batemerewe gukora, icyemezo cyafashwe mu kwirinda iki cyorezo.

Inama y'abaminisitiri mu Rwanda yafunguye kandi ingendo hagati y'intara, n'intara n'umujyi wa Kigali, nazo zari zarafunzwe mu kwirinda ikwirakwira rya coronavirus.

Uturere twa Rubavu na Rusizi twashyizwe mu kato kuko nta wemerewe kutuvamo cyangwa kutujyamo, ingendo mu modoka rusange ndetse na moto zitwara abantu birabujijwe.

Mu mpera y'icyumweru gishize, minisiteri y'ubuzima yatangaje ko habonetse abantu batanu banduye coronavirus mu karere ka Rusizi, kugeza ubu abamaze kuhaboneka bose hamwe ni 11.

Umunyamabanga wa leta muri minisiteri y'ubuzima yabwiye ikigo cya leta cy'itangazamakuru ko n'akarere ka Rubavu kashyizwe mu kato ngo bapime bamwe mu bahatuye bashingiye ku buryo kegeranye n'umujyi wa Goma muri DR Congo ahavugwa abarwayi b'iki cyorezo.

Ingamba zindi zari zarafashwe mbere zagumishijweho.